समाचार

फेसबुक म दोस्ती, बिहाव फेर गहना-गुरिया धरके भाग गए बिहाता

पाछू दिनन ग्वालियर म एक लड़का के लड़की संग फेसबुक म दोस्ती हो गे अऊ गोठ-बात करत प्यार हो गीस। अड़बड़ दिन ले चेट करे के पाछू दूनों मन बिहाव कर लीन। बिहाव के चार बछर पाछू पता चलिस के लड़की पहिलीच ले शादी शुदा हवे। जइसे राज खुलिस लड़की घर म रखे जेवर, नकदी समेट के भगा गे। एखर बाद रीवा मं युवती हर अपनेेच पति के खिलाफ अपहरण अउ दुष्कर्म के मामला दर्ज करा दीस। पाछू एक बरिस ले लड़की अपन उही पति ल ब्लैकमेल करके दस लाख रुपए के मांग करत हे।




गोला के मंदिर थाना कोति हनुमान नगर म रहईया 27 बछर के अमरनाथ शर्मा कम्प्यूटर कोचिंग के संचालक हे। साल 2009 म दिल्ली म एक कार्यक्रम म ओला रूपा तिवारी नाम के रीवां निवासी एक लड़की मिलीस। दिल्ली म मुलाकात के पाछू दुनों ह एक दूसरे लेे फेसबुक म चेट शुरू कर दीन। दुनों के बीच पहिली बने दोस्ती होइस फेर मोहब्बत हो गए। लड़की ह अपन आप ल कुवांरी बतायेे रहिस। साल 2010 म दुनों हर ग्वालियर के एक आर्य समाज मंदिर मं बिहाव कर लीन। बिहाव के पाछू थाोकन दिन तक सब ठीक-ठाक चि‍लिस। तहां सन 2014 के शुरू म अमरनाथ ल पता चलिस के रूपा तिवारी पहिली ले ही शादी शुदा हावे। अमरनाथ संग शादी करे के एक साल पहिली रूपा हर पहली शादी कर डरेे रहिस हे। जब अमरनाथ ल ए धोखा के बारे म पता चलिस त वो ह रूपा ल कहिस तहां उंखर बीच झगरा सुरू हो गे।

दुसर बिहाव के पोल-पट्टी खुले के बाद लड़की 87 हजार रुपए नकद अउ गहना-गुरिया समेट के भाग गए। एती अमरनाथ कुछ समझ पातीस ओखर पहिली लड़की ह रीवा जिला के एक थाना म अपन अपहरण व दुष्कर्म के मामला कथित पति के विरूद्ध दर्ज करा दीस। जेमा अमरनाथ अउ ओखर परिवार वाले मन ल आरोपी बनाय गीस। ये चक्‍कर म उमन ल कोर्ट ले अपन जमानत लेके बाहिर आए ल परिस।




जमानत म रिहा होए के बाद जब पीड़ित अमरनाथ हर अपन संग होए धोखाधड़ी अउ पत्नी के गहना-गुरिया धरके भागेे के शिकायत बर पुलिस मेर कई पईत गीस त पुलिस ओखर नइ सुनीस। हार ख के तब ओ हर कोर्ट मं मामला के शिकायत करिस। कोर्ट हर मामला ल सही मानत गोला के मंदिर थाना पुलिस ल तुरतेे धोखाधड़ी के मामला दर्ज करे के आदेस दीस। तेकर पाछू पुलिस हर रूपा तिवारी पुत्री इन्द्रशेखर निवासी रामलीला मैदान रीवा के खिलाफ अमानत म खयानत के मामला दर्ज करीस। अभी मामला चलत हवय।